Kombëtarja Shqiptare - Shqipëria fitoi me rezultat 2-1 ndaj Armenisë në Elbasan Arena, në një ndeshje që ka emocionuar çdo shqiptar si asnjëherë më parë.
Në këtë fitore kanë spikatur disa lojtarë, kurse koha.net ju sjell disa nga gjërat që kemi mundur të mësojmë nga kjo lojë.
De Biasi startoi ndeshjen me 11-she të gabuar
Trajneri italian padyshim se me mentalitetin dhe grupin e lojtarëve që ka sjellë në Kombëtare, është ndër më meritorët për formën aktuale të Kombëtares.
Gjithsesi, mënyra se si ai iu qas fillimisht ndeshjes ndaj Armenisë ishte e gabueshme.
Kjo u vërtetua me pranimin e shpejtë të golit dhe me një lojë më të zbehtë të Kombëtares në pjesën e parë.
Me ndryshimin e formacionit në pjesën e dytë dhe me inkuadrimin e lojtarëve më sulmues, ndryshoi e gjithë loja e Shqipërisë, duke e bërë shumë herë më të rrezikshme dhe atraktive lojën e Kombëtares.
Gashi duhet të jetë startues për Shqipërinë
Lojtari i Baselit, Shkëlzen Gashi e ka vërtetuar edhe njëherë se është në top-formë.
Jo më kot ai është edhe top-golashënues në Superligën Zvicerane.
Sulmuesi nga Kosova u inkuadrua në ndeshje nga banka rezervë, duke e ndryshuar menjëherë rrjedhën e lojës.
Paraqitja e tij në pjesën e dytë dëshmoi se ai meriton vendin e titullarit në Kombëtaren Shqiptare.
Mavraj vërtetoi se është jetik për Kombëtaren
Bëri shumë pak stërvitje. Ishte në dyshim deri në momentet e fundit. Por, ai vendosi që të sakrifikohet për Kombëtaren.
Dhe në fund, mundi i tij u shpagua.
Mavraj u tregua shumë solid në mbrojtje dhe shënoi golin e kthesës për Kombëtaren, duke luajtur sikur të kishte stërvitur pandërprerë për këtë ndeshje.
Padyshim, një lojtar shumë i rëndësishëm për Kombëtaren Kuq e Zi.
Shqipëria, e denjë për Euro 2016
Paraqitjet e Shqipërisë në këtë fazë eliminatore, duke përfshirë dhe miqësoret, dëshmojnë se Kombëtarja është pjekur jashtëzakonisht shumë dhe ka fituar siguri të pabesueshme nën udhëheqjen e De Biasit.
Dikur quhej “eufori”, por tanimë ky term nuk duket se qëndron për Shqipërinë.
Paraqitjet solide ndaj secilit kundërshtar që e ballafaqoi në këtë edicion dëshmojnë se Shqipëria është më e gatshme se kurrë për një garë të madhe, siç është Evropiani i ardhshëm. /koha.net/
0 Komente:
Post a Comment